Minzagnu

MINZAGNU

Comu un nutricu ‘nta la culla,
biatu, tu dormi ‘ntra la vaddi.
Palermu è a li to spaddi e lu talìa,
di munti pilligrinu, santa Rusulia.
Jocanu currennu li carusi strati strati,
unni ancora ci sunnu li balati;
e la genti fora, sutta lu sulu cucenti,
ciuciulianu parra junciuta.
Rit… Minzagnu miu, amuri di paiseddu,
ca cchiù ti guardu, cchiù mi pari beddu
A quantu figghi hai datu li natali
quanta genti ha vistu muriri,
quantu giuvini fuiri pu travagghiu
anchi si tu dicii: nun vogghiu.
Partuti, emigrati luntanu:
Assisi, Bologna e cu a Milanu.
Nun chianciri, nun ti scuraggiari,
ca li to figghi, prestu, hannu di turnari.
Rit… Minzagnu miu, amuri di paiseddu,
ca cchiù ti pensu e cchiù mi manchi tantu
La campagna ‘ntunnu china di ciuri
ca parinu tinciuti d’un pitturi.
Li strati beddi e profumati
ca li turisti restanu ‘ncantati.
E quannu si fa sira, pi la via,
di la campana si senti l’ave Maria.
Giuru ca pi mia fussi fistazza
Si moriri putissi ‘ntra li to vrazza.
Rit… Minzagnu beddu, Minzagnu miu
Supra di tia ci sta sulu Diu.

(Visto 41 volte, 1 visite oggi)